Мулоқотҳои судманди Кумитаи ҷавонон бо ҷавонони Хатлон

Душанбе, 03.02.2015 (АМИТ «Ховар», Фарзонаи Давлат).-Ду  рӯз аст, ки намояндагони Кумитаи ҷавонон, варзиш ва сайеҳии назди Ҳукумати Тоҷикистон дар ҷамоати деҳоти шаҳраки Бӯстонқалъа ва Коллеҷи ҷумҳуриявии аграрии ноҳияи Бохтар,  дар ҷамоати деҳоти Гулистони шаҳри Сарбанд ва инчунин ҷамоати деҳоти ноҳияҳои Ч.Румӣ, Қумсангир ва Шаҳритус бо ҷавонон, занон, варзишгарон, ходимони дин дар самти баланд бардоштани маърифати ҳуқуқию сиёсии ҷавонон,тарбияи онҳо дар руҳияи ватандӯстиву ватанпарастӣ  мулоқот доир гардид. 
 Зимни мулоқот масъулини кумита аз дастовардҳои мардуми тоҷик дар зарфи 24 соли истиқлолият ёдовар шуда, ҷавонону варзишгаронро барои саҳмгузорӣ дар обод гардонидани Ватани хеш ва муаррифии он дар арсаи байналмилалӣ даъват намуданд. 
 Ҳамзамон масъулини кумита дар мавзӯи Паёми Сарвари Давлат, ки ба вакилони Маҷлиси Олии кишвар 23 январ ироа гардид, сухан карда, иброз намуданд, ки он барои ҳар як фард ҳамчун роҳнамо буда, онро сармашқи  фаъолияти худ қарор диҳанд. 
Ҳамчунин дар доираи эълон шудани соли 2015 — Соли оила аз ҷавонон даъват шуд, ки барои пойдориву мустаҳкамии оила кӯшиш ба харҷ диҳанд, зеро оилаи солим- ин боигарии миллати тоҷик аст. Ҷавонон дар навбати худ низ омодагии хешро барои саҳмгузорӣ дар рушди кишвар изҳор  намуданд. 
Чунин мулоқотҳои судманд дар дигар шаҳру ноҳияҳои вилояти Хатлон идома доранд.