Мулоқоти Н.Зоҳидӣ бо Ф. Климчук

Душанбе, 24.02.2015 (АМИТ «Ховар»).-  23 феврали соли 2015 мулоқоти муовини вазири корҳои хориҷии Ҷумҳурии Тоҷикистон Низомиддин Зоҳидӣ бо муовини роҳбари Намояндагии минтақавии Созмони Милали Муттаҳид оид ба дипломатияи боздоранда дар Осиёи Марказӣ Фёдор Климчук баргузор гардид.
Дар мулоқот Фёдор Климчук аз фаъолият ва чорабиниҳои дарпешистодаи марказ ёдовар шуда, саҳми фаъоли Тоҷикистонро дар пешбурди лоиҳаҳои он таъкид намуд.
Муовини вазири корҳои хориҷӣ Низомиддин Зоҳидӣ талошҳои марказро ҷиҳати пешгирии низоъҳо ва муқовимат ба хатару чолишҳои фаромарзӣ дар минтақа мусбат арзёбӣ намуда, омодагии ҷониби моро барои ҳамкорӣ дар ин ва дигар самтҳо изҳор намуд.
Зимни мулоқот ҷонибҳо вазъи кунунӣ ва дурнамои ҳамкориҳои Ҷумҳурии Тоҷикистон ва Маркази минтақавии СММ-ро мавриди баррасӣ қарор доданд.