Мулоқоти сафири ҶТ бо губернатори вилояти Твери ФР

Душанбе,  04.02.2015. (АМИТ «Ховар», Марҳабои  Азамат).- Сафири  Тоҷикистон  дар  ФР  Имомуддин  Сатторов  дар  ҳошияи   сафари расмиаш  ба  вилояти  Твери  Федератсияи  Русия  бо  губернатори  вилоят  Андрей  Шевелёв  мулоқот анҷом  дод. Дар  ҷараёни  мулоқот  масоили  рушду   таҳкими  ҳамкории  байни  Ҷумҳурии  Тоҷикистон  ва  вилояти  Твер  дар  бахшҳои  мухталиф ва,  дар  навбати  аввал,  дар   самти  муносибатҳои  тиҷоратию  иқтисодӣ,  кишоварзӣ,  маориф,  илму  фарҳанг,  ҳамчунин танзими  равандҳои  муҳоҷирати  меҳнатӣ   мавриди  муҳокима  қарор  гирифтанд.
Дар  ин  бора  намояндаи  расмии   сафорати  ҶТ  дар  ФР  Муҳаммад  Эгамзод  ба  АМИТ «Ховар»  хабар  дод.
Назар  ба  иттилои  манбаъ,  дар  ҷараёни  мулоқот  губернатор  Андрей  Шевелёв  зикр намуд, ки  барои  рушди  ҳамкории  дуҷониба  дар  вилояти Твер  шароити  мусоид фароҳам  оварда, дар  минтақа  Ҷамъияти  фарҳанги Тоҷикистон фаъолият  дорад. 
Сафири  Тоҷикистон  дар  ФР  Имомуддин  Сатторов   дар навбати  худ   зикр  намуд, ки Тоҷикистон  ҷонибдори  ҳамкории ҳамаҷониба мебошад. Мавсуф даъват  намуд, ки  корхонаҳои  вилояти  Твер  лоиҳаҳои бахши  иқтисодиёту  кишоварзиро  муштаракона дар  амал татбиқ  намоянд. Номбурда изҳор  дошт, ки Тоҷикистон  барои  ба Русия  фиристодани  маҳсулоташ   имконоти  бузург  дорад.
 Сафир зикр  намуд, ки  Русия шарики  стратегии Тоҷикистон  буда, ба  таҳкими равобити   дуҷонибаи   иқтисодӣ  ниёз  дорад. 
Иштирокдорони  мулоқот  доираи  васеи  масъалаҳо,  аз ҷумла  густариши равобити  байни  донишкадаҳои олӣ,  муҳоҷирати  меҳнатӣ ва   табодули  фарҳангиро  муҳокима  намуданд.
Дар  мулоқот  ҳамчунин роҳбари  намояндагии   тиҷоратии Вазорати  меҳнат,  муҳоҷират ва  ҳифзи  иҷтимоии  аҳолии  ҶТ  дар  ФР  оид ба  муҳоҷират  Асрор  Одинаев,  сардори  раёсати маорифи  вилояти  Хатлони  ҶТ Хоналӣ  Қурбонзода,  ректори Донишгоҳи  давлатии  Қӯрғонтеппа  Маҳмад  Шодиев  ва  кормандони  масъули  сафорати  ҶТ  дар  ФР  иштирок  доштанд.