Мулоқоти вазири корҳои дохилӣ бо варзишгарон

Душанбе, 17.02.2015. (АМИТ «Ховар»,  Муқаддас  Темурзода).- Чанде  пеш дар  шаҳри  Душанбе   мулоқоти  вазири корҳои дохилии  Тоҷикистон  Раҳимзода  Рамазон  Ҳамро бо  варзишгарони саросари  минтақаҳои  кишвар  баргузор  шуд.
Тавре  ки  ВКД ҶТ хабар  медиҳад,  Рамазон  Раҳимзода ба  варзишгарон  барои  дастовардҳояшон  ва дар  мусобиқоти байналмилалӣ  ҷойҳои  шоистаро  ба  даст оварданашон,  ҳамчунин  барои тарғиби  тарзи  солими зиндагии  ҷавонон  арзи  сипос  карда,  ба онҳо барори  кор  ва муваффақиятҳо  орзу  намуд. 
Вазири  корҳои дохилӣ  зикр намуд, ки Сарвари  давлат, Президенти  Ҷумҳурии  Тоҷикистон  Эмомалӣ  Раҳмон  ба рушди  варзиш  таваҷҷуҳи  хоса зоҳир  менамояд. Имрӯз дар  ҷумҳурӣ садҳо иншоотҳои  варзишӣ  бунёд  гардида,  дар  ин  самт  ҳамаи   шароити  зарурӣ  фароҳам оварда  мешавад. 
Тайи  панҷ  соли охир бо  дастгирии  роҳбарияти  кишвар  дар  ҷумҳурӣ 19  варзишгоҳ,  621  майдончаи  варзишӣ, 11  ҳавзи  шиноварӣ ва  9  маҷмааи  варзишӣ  бунёд  гардида,  2700  майдончаи  варзишӣ,  635 толор, 14  ҳавзи  шиноварӣ ва  5  маҷмааи  варзишӣ  таъмир  шудааст. 
Бо  фармони  вазири  корҳои  дохилии  ҶТ  400 нафар  варзишгарон бо  мукофотҳои  пулӣ ва инъомҳои  қиматбаҳо  қадр  карда шуданд.