Насби таҷҳизоти муосири тиббӣ дар беморхона

Кӯлоб, 28.02.2015. (АМИТ «Ховар», Сулаймони Хол).-   Дар беморхонаи вилоятии шаҳри Кӯлоб барои баланд бардоштани  сифати хизматрасонии  тиббӣ тадбирҳои мушахас  рӯи кор омада, дастрас гардидани як силсила таҷҳизоти муосири муоина ва табобатӣ кори   табибон ва  беморонро хеле осон  гардонидааст. 
Дар айни замон   беморхона дорои 270 кат буда, бо таҷҳизоти  муосир муҷаҳҳаз мебошад ва   дар он 56 духтур ва 260  нафар ҳамшираи шафқат фаъолият менамояд.
Абдулатиф Нозимов- сардухтури беморхонаи вилоятии шахри Кӯлоб дар суҳбат ба хабарнигори АМИТ «Ховар» иброз намуд, ки бо мақсади ба роҳ мондани истифодаи дурусту саҳеҳи таҷҳизоти муосир, аз қабили эндовидеоҷарроҳӣ,   литокриптор ва гемодеализ роҳбарияти беморхона давра ба давра духтурони соҳибтаҷрибаро ба курсҳои бозомузӣ сафарбар намуда, дар оянда нақша доранд сатҳу сифати хизматрасонии тиббиро бо меъёрҳои байналмилалии ташхису табобат мутобиқ гардонанд, то шаҳрвандон дигар баҳри гирифтани  табобат  ба марказ ва кишварҳои хориҷӣ нараванд.