Нуробод: Паём-роҳнамо барои фаъолияти минбаъда

Душанбе, 14.02.2015. (АМИТ «Ховар», Мавҷуда Анварӣ).- Дар мақомоти иҷроияи ҳокимияти давлатии ноҳияи Нуробод вохӯрии гурӯҳи кории Дастгоҳи иҷроияи Президенти кишвар бо роҳбарии Абдураҳмон Маҳмадов-машваратчии калони Шӯрои амнияти миллӣ оид ба фаҳмонидани муҳтавои Паёми навбатии Президенти кишвар ба Маҷлиси Олии Ҷумҳурии Тоҷикистон доир гардид. 
Тибқи иттилои корманди мақомоти иҷроияи ҳокимияти давлатии ин ноҳия Гулрухсор Неъматова, А. Маҳмадов зикр кард, ки  Паёми  Президенти  кишвар ба Маҷлиси Олии Ҷумҳурии Тоҷикистон роҳнамое  барои фаъолияти  минбаъдаи  ҳар  як  сохтори давлатӣ мебошад.  Дар Паёми имсолаи  хеш бо назардошти  муҳимияти пойдории оилаи солим, ки асоси ҷомеаи солим аст, Сарвари давлат соли 2015-ро соли оила эълон намуданд.  Аз ин рӯ,  моро зарур аст, ки ҷиҳати дар амал татбиқ намудани дастуру супоришҳои Сарвари Давлат тамоми тадбирҳоро андешем.
Раиси ноҳияи Нуробод Сайдамир Сиёмарзода аз ҷумла афзуд, ки Паёми навбатии Роҳбари давлат ба Маҷлиси Олӣ моҳиятан ватандӯстиву меҳанпарварӣ буда, он пеш аз ҳама арҷ гузоштан ба арзишҳои милливу оини давлатдориро фаро мегирад. Дар ин радиф мо бояд қарзи шаҳрвандии худро дар назди миллат ба ҷо орем. 
Баргузории чунин вохӯриву суҳбатҳо бо иштироки масъулин дар деҳоти Ҳакимӣ, Муҷихарф, Комсомолобод ва Сафедчашма низ дар назар аст.