Нуробод: Сохтмони биноҳои таълимӣ идома дорад

Душанбе, 28.02.2015. (АМИТ «Ховар»,  Мавҷуда Анварӣ).-Дар айни ҳол дар ноҳияи Нуробод 86 муассисаи таҳсилоти миёнаи умумӣ ва як мактаб- интернати ҷумҳуриявӣ барои кӯдакони ятиму  бепарастор фаъолият дорад. 
«Сохтмони биноҳои нави таълимӣ,  синфхонаҳои иловагӣ идома дошта, бо таҷҳизоти зарурӣ таъмин  гардонда мешаванд. Соли гузашта бо дастгирии ЮНИСЕФ ва ЮНДР дар назди муассисаи таҳсилоти миёнаи умумии №25 деҳаи Зорон 6 синфхонаи иловагӣ сохта шуда, муассисаҳои таҳсилоти миёнаи умумии рақамҳои 3, 4, 31 ва 86 таъмир шуданд. Бо маблағгузории Вазорати маориф ва  илми кишвар корҳои ободонӣ ва сохтмонии варзишгоҳи муассисаи таҳсилоти миёнаи умумии рақами 2 дар деҳоти «Сафедчашма» бо маблағи 520 ҳазор сомонӣ аз  тарафи ҶДММ «Нуробод- лоиҳа» сохта, мавриди истифода  қарор дода шуд»,-иброз намуд раиси ноҳияи Нуробод Сайдамир Сиёмардзода ба хабарнигори АМИТ «Ховар» ва илова намуд, ки муҳайё гардондани шароити мусоид имкон медиҳад, ки сифати таълиму тарбия беҳтар шавад.