Оғози барномаи нав дар мубориза бо сил

Душанбе, 17.02.2015. (АМИТ «Ховар», Лайло Тоирӣ). — Барномаи  нави назорати сил дар кишварҳои Осиёи Марказӣ оғоз гардид. Ҳадафи ин барномаи минтақавӣ такмили ташхис ва табобати сил дар Тоҷикистон мебошад. Барномаи мазкур идомаи барномаҳои қаблии USAID мебошад, ба монанди: “TB CARE I”, “Тандурустии босифат” (QHCP) ва “Муошират оиди ВНМО ва бемории сил”.
Тавре ки аз хадамоти матбуоти вазорат иттилоъ доданд, дар натиҷаи ҳамкории муштараки USAID ва Ҳукумати Тоҷикистону дигар шарикон дар мубориза бар зидди сил вазъият дар панҷ соли охир ба эътидол оварда шуд. Аммо, бино ба ҳисоботи охирини ҷаҳонӣ дар бораи сил афзоиши шакли мутобиқгаштаи сил дар ҳамаи панҷ кишвари Осиёи Марказӣ боиси нигаронист. Ҳадафи барномаи панҷсолаи USAID оид ба назорати сил паст намудани сатҳи бемории сил ва шакли мутобиқгаштаи он дар Тоҷикистон мебошад. Барнома ба беҳтаргардонии гурӯҳҳои осебпазири аҳолӣ ба ташхис ва табобати бемории сил бо истифода аз усулҳои ба бемор нигаронидашуда, тақвияти таҳлилгоҳу дигар қисматҳои тандурустӣ дар вилояти Суғду Хатлон ва водии Рашт, ҳамчунин қабули ҳуҷҷатҳои танзимкунанда дар сатҳи миллӣ равона шудааст.
Сафир Эллиотт дастоварди бузурги USAID ва Ҳукумати Тоҷикистонро дар мубориза бар зидди сил зикр намуда, иқрор намуд, ки мубориза ҳанӯз ба охир нарасидааст.
Барнома аз ҷониби консортсиуми шарикон бо роҳбарии Лоиҳаи “ҲОУП” ва дар ҳамкорӣ бо Иттиҳоди Шоҳигарии Нидерланд оид ба мубориза бар зидди бемории сил (KNCV), Созмони байналмилалии муҳоҷират, Фонди СПИД Шарқу Ғарб амалӣ мегардад.
“Барномаи назорати бемории сил”-и USAID бо буҷаи пешбинигардидаи 13,2 миллион доллари ИМА дар муддати панҷ сол боз як мисоли кумаки Ҳукумати ИМА барои беҳтар намудани саломатии шаҳрвандони Тоҷикистон аст. Кумакҳои грантии USAID ба Тоҷикистон ҳоло ба ҳисоби миёна ҳар сол тақрибан 30 миллион долларро ташкил медиҳанд, ки аз он 30% ба соҳаи тандурустӣ равона шудааст.