Оғози лоиҳаи кумакҳои бебозгашти Ҷопон дар Рашт

Душанбе, 13. 02.2015. (АМИТ «Ховар»,Фарзона Достонзода). — 12 феврали соли 2015 маросими ба  тасвиб расидани созишномаи грантӣ  оид ба Лоиҳаи беҳтар гардонидани марказҳои дастгирии кўдакони имконияташон маҳдуд дар ноҳияи Рашт дар Душанбе баргузор гардид.  
Тавре  ки ба АМИТ «Ховар» аз Сафорати Ҷопон дар Тоҷикистон иттилоъ доданд, созишномаи мазкур аз ҷониби Сафири Ҷопон дар Ҷумҳурии Тоҷикистон  Такаши Камада  ва  раиси ноҳияи Рашт Қаноатшо Лоиқов, ба тасвиб расид. Маблағи умумии 102,371 доллари ИМА аз тарафи Ҳукумати Ҷопон барои лоиҳаи мазкур дар доираи барномаи кумакҳои бебозгашт барои бахши аъзами аҳолӣ ва амнияти башарӣ ҷудо гардид.
Мавриди зикр аст, ки дар чаҳорчӯбаи ин лоиҳа бинои Маркази хизматрасониҳои рӯзонаи Аниса пурра таъмир мегардад ва Маркази нави машваратгоҳи равониву тиббӣ-омӯзгорӣ дар Беморхонаи марказии ноҳияи Рашт таъсис меёбад. Ҳамзамон тавассути лоиҳаи мазкур ҳарду иншоот бо таҷҳизоти зарурӣ муҷаҳҳаз гардонида мешаванд. Бо анҷом ёфтани лоиҳа иншоотҳои мазкур метавонанд ба кӯдакони имконияташон маҳдуд дар ноҳияи Рашт ва атрофи он хизматҳои ҳамаҷониба ва кумак расонанд.