Оғози Спартакиадаи донишҷӯён

Душанбе, 14.02.2015. (АМИТ «Ховар», Раъно Нусратуллозода).-Аз 17 феврал то 10 апрели соли ҷорӣ дар маҷмааи варзишии «Хуррамшаҳр» ва майдончаҳои варзишии кафедраи тарбияи ҷисмонии Донишгоҳи давлатии Хуҷанд  ба номи академик Бобоҷон Ғафуров Спартакиадаи ХХIV донишҷӯёни факултаҳо доир мегардад. 
Ба иттилои декани факултаи тарбияи ҷисмонии донишгоҳ Сайфулло Бойматов мақсади спартакиадаи донишҷӯён тарғибу ташвиқи намудҳои гуногуни варзиш, таҳкими дӯстӣ ва ватанпарастӣ, тарғиби тарзи ҳаёти солим ва ҷалби донишҷӯён ба машғулиятҳои мунтазами варзишӣ буда, он аз рӯи 10 намуди варзишӣ: гӯштинҳои тарзи озод ва камарбандӣ, бокс, футбол, волейбол (писарону духтарон), баскетбол (писарону духтарон), теннис, шоҳмот, шашка, варзиши сабук гузаронида мешавад. Дастаҳои ғолиб бо диплом ва туҳфаҳои хотиравии Раёсати донишгоҳ қадршиносӣ мешаванд.
Гуфта мешавад, ки маросими ифтитоҳи чорабинии мазкур бахшида ба Рӯзи Қувваҳои мусаллаҳи Ҷумҳурии Тоҷикистон 16 феврал дар маҷмааи варзишии «Хуррамшаҳр»-и донишгоҳ пешбинӣ гардидааст.