Охирин иҷлосияи ММ МО ҶТ дар даъвати чорум

          Душанбе, 18.02.2015.(АМИТ «Ховар», Марзия Саидзода).- Тибқи қарори ба имзорасидаи раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев 5 марти соли равон дар шаҳри Душанбе иҷлосияи бистуякум ё охирин иҷлосияи Маҷлиси миллии Маҷлиси Олии Ҷумҳурии Тоҷикистон  дар даъвати чорум баргузор мегардад.
           Аз палатаи болоии Парлумони мамлакат ба АМИТ «Ховар» иттилоъ доданд, ки дар иҷлосия қонунҳои Ҷумҳурии Тоҷикистон «Дар бораи фаъолияти илмӣ ва сиёсати давлатӣ оид ба илму техника», «Дар бораи ҳифзи ҳуқуқҳои кӯдак», «Дар бораи адвокатура ва фаъолияти  адвокатӣ», «Дар бораи арбитражи байналмилалии тиҷоратӣ» ва «Дар бораи нафт ва газ» баррасӣ ва ҷонибдорӣ хоҳанд гардид. Ҳамзамон баррасии  дигар масоили марбут ба рушди  ҳаёти иҷтимоию иқтисодӣ ва фарҳангии кишвар дар назар аст.