Омӯзиши забони кореягӣ густариш меёбад

Душанбе, 5.02.2015. (АМИТ «Ховар», Раъно Нусратуллозода).-Дар мулоқоти ректори Донишгоҳи давлатии омӯзгории Тоҷикистон ба номи С.Айнӣ (ДДОТ) Носирҷон Салимов бо сафири Ҷумҳурии Корея дар Ҷумҳурии Тоҷикистон Ён Жон Гу дирӯз масъалаи тавсеаи омӯзиши забони кореягӣ мавриди баррасӣ қарор гирифт. 
Тибқи иттилои сухангӯи ДДОТ Бахтиёри Абдураҳим, дар вохӯрии мазкур, ки бо ҳузури чанд тан шаҳрванди ин мамлакат-омӯзгорони забони кореягӣ дар донишгоҳ баргузор шуд, зикр гардид, ки майлу рағбат ва ҷаҳду талоши муҳассилини мо барои азхуднамоии забони мазкур ниҳоят зиёд мебошад. Тавре ки ректор Н.Салимов тазаккур дод, дар маърифатгоҳи мо дар радифи он ки омӯзиши забони кореягӣ ба тарзи дилхоҳ роҳандозӣ шудааст, ҳамзамон Маркази фарҳангии Корея фаъолият дорад, ки барои рушд ва омӯзиши ин забон мусоидат хоҳад кард. 
Дар мулоқот ҷонибҳо аз густариши ҳамкориҳо изҳори хушҳолӣ намуда, таъкид доштанд, ки дар оянда таъсиси шуъба ва факултаи забони кореягиро низ бояд ба нақша гиранд. Ҳамзамон гуфта шуд, ки забони кореягӣ яке аз забонҳои пуркорбурд маҳсуб ёфта, омӯзиши он ҳаргиз аз манфиат холӣ нахоҳад буд.
Ректор Н.Салимов ба сафир мужда расонд, ки донишгоҳ маҷаллае таъсис дод ва дар он осори гаронарзиш ва безаволи адибони бурунмарзӣ аз ҷониби донишҷӯён тарҷума ва нашр мешаванд. Шуруъ аз шумораи аввал, ки то ҷашни Наврӯзи оламафрӯз ба табъ мерасад, ҳатман дар он тарҷума аз асарҳои намояндагони адабиёти Корея ҷой хоҳад дошт. 
Сафир Ён Жон Гу иттилоъ дод, ки чанде баъд муҳлати сафирии ӯ ба анҷом мерасад ва изҳори итминон кард, ки бо сафири тозатаъйин равобити ҳамкорӣ боз ҳам тақвият меёбанд.