Омодагӣ ба интихобот дар Хатлон

Ховалинг, 24.02.2015 (АМИТ «Ховар», Сулаймони Хол).-  Имрӯзҳо дар ноҳияи   Ховалинг чун дар дигар минтақаҳои ҷумҳурӣ омодагӣ ба маъракаи муҳими сиёсӣ- интихоботи вакилон ба Маҷлиси намояндагони Маҷлиси Олии ҷумҳурӣ ва маҷлисҳои маҳаллии вакилони халқ ҷараён дорад. 
Бо дастгирии ҳокимияти маҳалӣ ва комиссияи ҳавзаи интихоботӣ барои бештар огоҳонидани сокинон бо ҷараёни интихобот дар бозору марказҳои савдо, терминали мусофиркашонӣ ва дигар ҷойҳои ҷамъиятӣ буклету хабарнома ва дастурҳо тақсим шуда истодаанд.
Бояд зикр намуд, ки як қисми чавонон имсол бори аввал дар интихоб иштирок мекунанд, аз ин рӯ ба ҳамаи онҳо тарзи пур кардани бюллетен нишон дода мешавад. Дар баробари ин  масъулин ба деҳаҳои дурдасти ноҳия рафта, ба сокинон суҳбату вохӯриҳо гузаронида истодаанд. 
Дар айни замон  ҳамаи участкаҳои интихоботии ноҳияи Ховалинг ба маъракаи муҳими сиёсӣ пурра омода гардидаанд.
Дар участкаҳои интихоботии ноҳияи Фархор охирин корҳои омодагиро ба интихобот анҷом дода, рӯйхати ҳамаи сокиноне, ки ҳуқуқи дар интихобот иштирок карданро доранд, тартиб додаанд. 
Дар кӯчаю хиёбонҳо шиору овеза оид ба рӯзи баргузории интихобот овехта шудаанд. Сокинон аллакай медонанд, ки ба кадом участка рафта овоз медиҳанд. Дар ноҳияи мазкур  бо ҷалби васеи ҷавонон иқдоми  интихоботӣ гузаронида шуд. Ихтиёриён дар муддати кутоҳ ба сокинони ноҳия беш аз 2 ҳазор буклету дигар ҳуҷҷатҳои огоҳкунандаро тақсим намуданд.То баргузории интихобот рӯзҳои башумор мондааст ва дастандаркорон мақсад доранд дар рӯзҳои минбаъда низ чунин иқдомҳоро доир намоянд.