Ошкоршавии дуздии маснуоти заргарӣ

 Душанбе,28.02.2015. (АМИТ «Ховар», Муқаддас Темурзода).-Ба шуъбаи ВКД дар ноҳияи Вахш сокини ҳамин ноҳия Файзигул Шарифова, соли таваллудаш 1980 муроҷиат намудааст, ки рӯзи 25 феврали соли ҷорӣ, шахси номаълум бо тариқи пинҳонӣ вориди дӯкони тиллофурӯшиаш, воқеъ дар маркази ноҳия, 97 адад ангуштаринҳои тиллоиро дуздида, аз ҷойи ҳодиса ғайб задааст. Арзиши умумии маснуоти заргарии дуздидашуда 27 ҳазору 50 сомониро ташкил медиҳад. 
ВКД ҶТ хабар медиҳад, ки дар натиҷаи гузаронидани чорабиниҳои фаврӣ-ҷустуҷӯӣ кормандони милитсия шаҳрванд Рустам Қосимов, соли таваллудаш 1976, сокини ноҳияи Вахшро бо гумони даст доштан дар ҷинояти дуздии мазкур дастгир намуданд. 
Далелҳои шайъӣ  гирифта шуданд. Нисбат ба ҳодисаи мазкур парвандаи ҷиноятӣ оғоз гардида, тафтиш идома дорад.  
Тибқи маълумоти ВКД ҶТ соли 2014 аз ҷониби  кормандони милитсия
3 ҳазору 630 ҷинояти дуздӣ ба қайд гирифта шудааст.