Озмуни “Беҳтарин осорхонаи мактабӣ” дар Суғд

Душанбе, 18.02.2015. (АМИТ “Ховар”, Рафоати Абдулҳамид).- Дар вилояти Суғд  78 осорхонаи мактабӣ фаъолият мебарад, ки  12 адади онро осорхонаи «Шӯҳрати ҷангӣ», «Шарафи ҷангӣ» ва «Ҷанги Бузурги Ватанӣ»  ташкил мекунанд.
Тавре ки Хадамоти матбуоти раиси вилояти Суғд хабар додааст, бо мақсади баланд бардоштани мавқеи осорхонаҳои мактабӣ дар тарбияи маънавӣ, ватандӯстӣ, инкишофи худшиносӣ, ифтихори миллии хонандагони муассисаҳои таҳсилоти умумӣ ва ҷиҳати муҳайё  намудани  шароити мусоид барои нигоҳдорӣ ва намоиши  бозёфтҳои нодир, ба монанди ашёҳои таърихӣ, нигораҳои қадимӣ  бо фармоиши сардори раёсати маорифи вилоят озмуни вилоятии «Беҳтарин осорхонаи мактабӣ» эълон шуд.
Озмун дар ду давр гузаронида шуда,  даври хотимавии он дар арафаи ҷашни 70-солагии Иди Ғалаба ҷамъбаст мегардад.