Паём — дастури созанда

Душанбе, 9.02.2015. (АМИТ «Ховар», Раъно Нусратуллозода).-7 феврал дар Донишкадаи молия ва иқтисоди Тоҷикистон (ДМИТ) бахшида ба баррасии дастуру ҳидоятҳо ва вазифаҳои Паёме, ки Президенти Ҷумҳурии Тоҷикистон Эмомалӣ Раҳмон ба Маҷлиси Олӣ 23 январи соли 2015 ироа намуд, ҷаласа доир гардид. 
Илҳомуддин Иброҳимов, муовини ректор оид ба таълими ДМИТ самтҳои иқтисодӣ, Ғуломҷон Мирзоев, дотсенти кафедраи фанҳои гуманитарӣ доир ба сиёсати хориҷии кишвар ва Саидамир Сафаров, устоди кафедраи забонҳои русӣ ва тоҷикӣ самти маориф ва илми Ҷумҳурии Тоҷикистонро мавриди таҳлил ва баррасӣ қарор доданд. Аз ҷумла гуфта шуд, ки Паёми навбатӣ дастур барои ташаккул ва рушди тамоми соҳаҳои кишвар маҳсуб мешавад. Дар Паём стратегияи рушди ҷомеа, сиёсати хориҷӣ ва дохилии кишвар ба таври возеҳ ифода ёфта, татбиқи амалии дастуру супоришҳои Сарвари Давлат ва барномаҳои муҳиме, ки ҷомеаи моро аз мушкилиҳо раҳоӣ мебахшанд, масоили меҳварии ин ҳуҷҷати муҳим ба шумор мераванд.
Зикр шуд, ки ҳайати устодону кормандон ва донишҷӯёни ДМИТ бандҳои Паёмро оид ба таъмини рушди иқтисодии кишвар, баланд бардоштани ҳисси худшиносӣ ва худогоҳии миллӣ, дурӣ ҷустан аз мафкураи ғайр, мақоми зан дар ҷомеа, рушди соҳибкорӣ, нақши ҷавонон дар рушди кишвар, ҳимояи волоияти қонун ва манфиатҳои давлату ҷомеа аз вазифаҳои асосии худ дониста, минбаъд мекӯшанд, ки ҳар як нуктаи онро сармашқи кори худ намоянд.