Пешгирии ҳодисаҳои номатлуби ҷомеа

Душанбе, 25.02.2015 (АМИТ “Ховар”, Рафоати Абдулҳамид).-24-уми феврали соли равон кормандони шуъбаи рушди иҷтимоӣ ва робита бо ҷомеаи дастгоҳи раиси ноҳияи Бобоҷон Ғафуров дар якҷогӣ бо кормандони шуъбаи кор бо занон ва оила, маориф ва бахши ҷавонон, варзиш ва сайёҳии ноҳия дар якчанд маҳаллаи ҳудуди ноҳия мулоқот доир намуданд.
Тавре ки Хадамоти матбуоти раиси вилояти Суғд хабар додааст, дар маҳаллаҳои Ф. Аҳмедов ва Фахрии ҷамоати деҳоти Ҳайдар Усмонов, маҳаллаи 9  майи ҷамоати деҳоти Унҷӣ, маҳаллаҳои Сартӯқай, Навоӣ, А. Каримов, 2500-солагии Хуҷанд ва маҳаллаи Ороми ҷамоати деҳоти Ёва оид ба пешгирии ҳодисаҳои номатлуби ҷомеа, аз қабили вайроншавии оилаҳо, худкушӣ, шомилшавии ҷавонон ба ҳар гуна ҳизбу ҳаракатҳои ифротӣ ва инчунин маъракаи интихоботӣ корҳои тарғиботиву ташвиқотӣ гузаронида шуданд.
Ҳамзамон аз ҷониби гурӯҳи тарғиботӣ дар маҳаллаҳои ҷамоатҳои деҳоти Хистеварз, Исфисор, Зарзамин ва шаҳраки Ғафуров оид ба масъалаҳои мазкур корҳои тарғиботиву ташвиқотӣ доир шуданд.