Пирӯзии варзишгарони тоҷик дар Эрон

Душанбе, 24.02.2015. (АМИТ “Ховар”, Ситораи Боймурод).- Дирӯз дар ҷазираи Киши Ҷумҳурии Исломии Эрон мусобиқаи байналмилалии муайтай доир гардид. Мусобиқаи мазкур миёни кишварҳои Афғонистон, Озарбойҷон, Қирғизистон, Ироқ, Юнон, Ҷумҳурии Исломии Эрон ва Тоҷикистон доир шуд.
Дар маҷмӯи рақобатҳо бо 4 медали тилло, 2 нуқра ва 4 биринҷӣ Тоҷикистон мавқеи 3-юмро дар ҳайати даставӣ ишғол намуд. Барандагони медали тилло Фаробахш Шарифов дар вазни 36 кг миёни наврасон, Фирӯз Шарифов дар вазни 63 кг, Шуҳратҷони Исвализода дар вазни 60 кг миёни бузургсолон ва Ҷомӣ Латифов дар вазни 67 кг ба ҳисоб мераванд. Фирӯз Шарифов барои сари вақт мағлуб ва ба нокаут равон кардани ҳарифонаш беҳтарин варзишгари ин мусобиқот эътироф гардид ва бо Ҷом қадрдонӣ шуд.