Рӯнамоии китобҳои кӯдакона

Душанбе, 12.02.2015. (АМИТ «Ховар», Раъно  Нусратуллозода).-10 феврал дар Осорхонаи маорифи Академияи таҳсилоти Тоҷикистон рӯнамоии китобҳои тозанашри кӯдакона барои кӯдакони синни томактабӣ доир гардид. Иштирокчиёни чорабинӣ назари худро роҷеъ ба нашри чунин маводи хонданӣ ва ҷолибу хушсифат иброз намуда, таъкид карданд, ки воқеан кӯдакону наврасони мо ба чунин китобҳо эҳтиёҷ доранд.   
Баргузории чорабинии мазкурро президенти Академияи таҳсилоти Тоҷикистон  Ирина Каримова татбиқи Паёми Президенти Ҷумҳурии Тоҷикистон ба Маҷлиси Олӣ оид ба густариш ва беҳбуд бахшидани фаъолияти муассисаҳои томактабӣ маънидод намуда, аз номи Раёсати Академияи таҳсилоти Тоҷикистон ва Вазорати маориф ва илми ҶТ ба ташаббускорону иштирокдорони чорабинӣ арзи ташаккур намуда, мураттибону рассомон ва ширкатҳои саҳмгузорро ба густариши таҳия ва нашри ҳарчи бештари чунин маводи ҷолиб даъват намуд.