“Сайри маънӣ”оид ба осори Ҷомӣ

Душанбе, 11.02.2015. (АМИТ “Ховар”, Ситораи Боймурод).- Бахшида ба 600 солагии Мавлон Абдураҳмони Ҷомӣ  нашриёти «Адиб» маҷмӯаи мақолаҳоеро бо номи “Сайри маънӣ”  ба нашр расонид.  
Тавре ки сомонаи расмии Китобхонаи миллии Тоҷикистон хабар медиҳад, китоби мазкур бо маблағгузории ташкилоти ҷамъиятии байналмилалии фонди «Муколамаи Авруосиё» нашр гардида,  аз ҷониби адиби тоҷик Абдурауф Муродӣ тартиб дода шудааст.
 Он мақолаҳои Президенти Ҷумҳурии Тоҷикистон Эмомалӣ Раҳмон — «Мавлоно Ҷомӣ — шоир, олим ва орифи барҷаста», академик Маҳмадулло Лутфуллоев — «Фарзандро тарбият мебояд», муовини саркотиби илмии АИҶТ Мирзо Муллоаҳмад — «Андешаҳои башардӯстии Абдураҳмони Ҷомӣ», профессор Урватулло Тоиров — «Тавзеҳе ба рисолаҳои адиб», номзади илмҳои филологӣ  Шодӣ  Шокирзода — «Сухан аз «Фарҳанги осори Ҷомӣ»»-ро дар бар мегирад.