Шиори донишҷӯён: «Нест бод терроризм»

Душанбе,11.02.2015. (АМИТ “Ховар”, Рафоати Абдулҳамид).- Дар Коллеҷи ҳунарҳои мардумии шаҳри Истаравшан ҳамоиши якҷояи устодону донишҷӯён ва омӯзгорону хонандагони Литсеи касбии техникии №14 таҳти шиори «Нест бод терроризм!» баргузор гардид.
Тавре ки аз Хадамоти матбуоти раиси вилояти Суғд хабар доданд, дар ҳамоиш директори коллеҷ Н. Хоҷаев зикр дошт, ки равияву ҳизб ва ҳаракатҳои ифротгаро имрӯз ба мушкилоти ҷаҳонӣ табдил ёфтаанд ва мо бояд ҳушёрии сиёсиро аз даст надиҳем.
Устодони коллеҷи мазкур зуҳуроти нангин- ифротгароиву терроризмро маҳкум намуда, кулли ҷавононро ба омӯзиши таърихи пурғановати миллат, илму ҳунар ва техникаю технологияҳои муосир даъват намуданд.