Соли 2014 барои БАБТ соли бобаракат буд

Душанбе, 10.02.2015. (АМИТ «Ховар»).- 9 феврал ҳайати  олимақоми Бонки аврупоии бозсозӣ ва  тавсеъа (БАБТ) ҷараёни  фаъолияти  бонк  ва  дурнамои  иқтисодии онро  муҳокима  намуд. 
Тавре  аз  намояндагии  бонки  мазкур  хабар  доданд, аъзои  ҳайат  изҳор  доштанд, ки ҳаҷми  сармоягузории  бонк  дар  Тоҷикистон  хеле  афзуда, соли  2014  ба 62  миллион  евро  расид, ки назар  ба  соли  2013 беш  аз  4,5  маротиба   зиёд  аст.
Дар  гузориши ҳарсолаи бонк  вазъи  раванди  гузаштан  аз  иқтисодиёти  фармоишӣ  ба иқтисодиёти  кушодаи  бозаргонӣ дар  кишварҳое, ки  бонк  барои онҳо  маблағ  ҷудо  мекунад,  таҳлил  карда  мешавад.
Мувофиқи  пешгӯии  Бонки  аврупоии  бозсозӣ ва тавсеъа, маҷмӯи  маҳсулоти  дохилӣ  нисбат ба  6,7  фоизи  соли 2014  дар  соли  2015 баробари  4,4  фоиз  меафзояд, ки  сабаби  ин коҳиш  ёфтани  ҳаҷми  интиқоли  маблағ  аз  Русия  ва  содирот ба  ин  кишвар  мебошад.