Суғд: муаррифии раисони нав аз ҷониби А.Қодирӣ

Хуҷанд, 06.02.2015. (АМИТ Ховар, Абдуҳад Шарифзода).-Дирӯз  дар вилояти Суғд роҳбарони навтаъйини чор шаҳру навоҳӣ муаррифӣ гардиданд. Тавре ки ба АМИТ Ховар аз маркази матбуоти роҳбари вилоят иттилоъ доданд,  мутобиқ ба Фармони Президенти Ҷумҳурии Тоҷикистон аз 3 феврали соли ҷорӣ дар вазифаи роҳбарии чор шаҳру навоҳии вилояти Суғд тағйироти кадрӣ ба амал омад. 
Тибқи фармони мазкур Наим Набизода — иҷрокунандаи вазифаи раиси шаҳри Истаравшан, Умар Ёқубзода — иҷрокунандаи вазифаи раиси ноҳияи Шаҳристон, Рустамбой Ҷӯраев — иҷрокунандаи вазифаи раиси ноҳияи Ғончӣ ва Ислом Шафиев — иҷрокунандаи вазифаи раиси шаҳри Панҷакент таъйин гардид.
Раиси вилояти Суғд Абдураҳмон Қодирӣ  дирӯз чор нафар раиси навтаъйини шаҳру ноҳияҳои Истаравшан, Панҷакент,  Шаҳристон ва  Ғончиро  ба фаъолони ин шаҳру ноҳияҳо муаррифӣ намуда, ба онҳо баҳри иҷрои вазифаҳои пурмасъул комёбӣ таманно намуд.