Ташхиси тиббии ройгон барои мардуми ниёзманд

Душанбе, 20.02.2015. (АМИТ «Ховар», Мавҷуда Анварӣ).- Бо ибтикори маъмурияти беморхонаи вилоятии ба номи Бӯрӣ Воҳидов ва маркази кумаки аввалияи тиббию санитарии шаҳри Қӯрғонтеппа гурӯҳе аз табибон ба маҳаллаҳои маркази маъмурии вилоят рафта, мардуми ниёзмандро ройгон аз ташхиси тиббӣ мегузаронанд.
Тавре ки сарпизишки беморхонаи клиникии вилоятии ба номи Бӯрӣ Воҳидов, Алиҷон Нуралиев иттилоъ дод, моҳи феврал дар маҳаллаҳои Хатлон, Кайҳоннавардон, Ҳоҷӣ Шариф, Борбад, Ҳаёти нав ва Ваҳдати шаҳри Қӯрғонтеппа зиёда аз 3700 нафар шаҳрванд аз ташхиси тиббӣ гузаронида шуд.
А. Нуралиев илова намуд, ки то ҷамъбасти семоҳаи аввали соли 2015 ҷавобан ба Паёми навбатии Президенти кишвар сокинони беш аз 30 маҳаллаи шаҳри Қӯрғонтеппа аз ташхиси тиббӣ гузашта, барои табобат аз ҷониби пизишкони собиқадору кордон тавсияҳои касбӣ дода мешаванд.