Тоҷикистон дар намоишгоҳи «Манбаи барқи оянда» иштирок мекунад

Душанбе,  05.02.2015. (АМИТ «Ховар»,  Кристина  Эрлих).-  3  феврал  дар  шаҳри  Душанбе  мулоқот бо  ҳайати  Қазоқистон  бо  роҳбарии  комиссари  ЭКСПО — 2017 муовини аввали  вазири  корҳои  хориҷии  Қазоқистон Рапил Жошибоев  баргузор  шуд. 
Аз  ҷониби  Тоҷикистон  дар  мулоқот  вазири  рушди  иқтисод  ва  савдои  ҶТ  Неъматулло  Ҳикматуллозода  ва  муовини  раиси Палатаи  савдо  ва  саноати Ҷумҳурии  Тоҷикистон  Манзура  Рустамова  ширкат  доштанд.  Дар  ҷараёни   мулоқот  масоили  вусъат  бахшидани  ҳамкории   дуҷонибаи  тиҷоратию  иқтисодии байни  Тоҷикистону  Қазоқистон  мавриди  муҳокима  қарор  гирифтанд.
Тавре  ки  аз  маркази  матбуоти  ПСС  ҶТ  ба  АМИТ «Ховар»  хабар  доданд,  Рапил  Жошибоев  аз  ҷараёни  омодагӣ  ба ЭКСПО — 2017  ва шартҳои  иштирогк дар  он  нақл  карда, аҳамияти   ҳамкории Тоҷикистону  Қазоқистон дар  намоишгоҳро  хотирнишон  сохт. 
Шиори  намоишгоҳ  «Манбаи  барқи  оянда»  буда  ва  он  ба  манбаҳои алтернативии барқ ва  технологияҳои  «сабз»  бахшида шудааст.  Намоишгоҳи  умумиҷаҳонӣ аз  3  июн  то  10  сентябри  соли  2017  дар  шаҳри  Остона   баргузор  шуда,  дар  он   қариб 100 кишвари  ҷаҳон  ва  10  созмони байналмилалӣ  иштирок  менамоянд. 
Намоишгоҳи  ЭКСПО — 2017 имкон  медиҳад, ки  технологияҳои  беҳтарини  сарфаи  барқи  ҷаҳон,  нақшаю  технологияҳои нави  истифодаи  манбаҳои  мавҷудаи   алтернативии  барқ аз  қабили  қувваи офтоб,  бод,  обҳои  баҳру  уқёнус  ва  чашмаҳои гарм  истифода шаванд. 
Муовини  раиси  ПСС ҶТ  М.Рустамова  изҳор  дошт, ки Тоҷикистон узви  Бюрои  байналмилалии  намоишгоҳ  буда, ҷумҳурии  мо  дар   намоишгоҳҳои  ЭКСПО — 67 (Монреал, Канада), ЭКСПО — 70 (Осака, Ҷопон), ЭКСПО — 2000 (Ганновер, ҶФО),  ЭКСПО — 2005 (Айчи, Ҷопон), ЭКСПО — 2010 (Шанхай, ҶМЧ), ва  ғайра   иштирок  кардааст.