Туркия: ифтитоҳи ду қитъаи овоздиҳии интихоботӣ

 
Анқара, 25.02.2015. (АМИТ «Ховар», Фарангис Раҳимова). — Сафорати Ҷумҳурии Тоҷикистон  дар Туркия ба интихоботи дар пешистодаи парлумонӣ дар Тоҷикистон, ки 1-уми марти соли 2015 баргузор мегардад, омодааст. Бо дастури Комиссияи марказии интихобот ва раъйпурсӣ (КМИР)-и ҶТ аз ҳисоби кормандони сафорат дар Анқара комиссия оид ба интихобот таъсис ёфт ва чорабиниҳои омодагӣ ба ин маъракаи муҳими сиёсӣ ба итмом расиданд. Чуноне ки аз сафорат хабар доданд, дар Туркия ду нуқтаи овоздиҳӣ дар бинои сафорат дар Анқара ва дар консулгарии генералӣ дар шаҳри Истанбул ифтитоҳ мегардад. 
Тибқи маълумоти ғайрирасмӣ дар ин давра, зиёда аз 700 шаҳрванди Ҷумҳурии Тоҷикистон дар Туркия иқомат дорад, аз ҷумла донишҷӯёни тоҷике, ки дар донишгоҳҳои олии Туркия таҳсил мекунанд.
Маврид ба зикр аст, ки барои баргузории чунин маъракаҳо сафорат таҷрибаи бой дорад ва далели он интихоботи президентии Тоҷикистон аст, ки 6 ноябри соли 2013 дар сатҳи олӣ доир гардид. 
Ёдовар мешавем, ки дар Тоҷикистон расман 8 ҳизб ба қайд гирифта шудааст — Ҳизби халқии демократии Тоҷикистон, Ҳизби наҳзати исломии Тоҷикистон, Ҳизби коммунистии Тоҷикистон, Ҳизби аграрии Тоҷикистон, Ҳизби сотсиалистии Тоҷикистон, Ҳизби демократии Тоҷикистон, Ҳизби сотсиал-демократии Тоҷикистон ва Ҳизби ислоҳоти иқтисодии Тоҷикистон.