Ванҷ: Бонувон аз заҳмати обкашонӣ раҳоӣ ёфтанд

Душанбе, 02.02.2015. (АМИТ «Ховар», Мавҷуда Анварӣ).-Дар соли 2014 бо маблағгузории Корхонаи  воҳиди давлатии «Хоҷагии манзилию коммуналӣ» кашидани хатти нав ҷиҳати бо оби нӯшокӣ таъмин кардани мавзеи аҳолинишини Дашти Бовуд ва маҳаллаи Сомониёни маркази ноҳияи Ванҷ оғоз гардид. 
Тибқи иттилои Одинашо Пиров- сардори Корхонаи фаръии воҳиди давлатии хоҷагии манзилию коммуналии ноҳия, ин иншооти самти иҷтимоӣ барои сокинони ин қисмати шаҳраки Рохарв, ки аз нарасидани оби ошомиданӣ танқисӣ мекашанд, басе зарур мебошад ва он то ҷашни Рӯзи Ваҳдати миллӣ мавриди истифода қарор мегирад.
Номбурда ҳамзамон афзуд, ки танҳо соли гузашта ба деҳаҳои Сед, Бунай, Бунига ва Рави  деҳоти «Техарв», «Водхуд» ва «Ҷовидон» хатти оби нӯшокӣ дар масофаи 4-5 километр бунёд шуд ва сокинони ин рустоҳо,  махсусан бонувон, аз заҳмати обкашонӣ аз маконҳои хеле дур раҳоӣ ёфта, шукронаи ғамхориҳои доимии Президенти кишварро мекунанд.