Вохӯрӣ бо интихобкунандагон

 Душанбе, 19.02.2015.(АМИТ «Ховар»).-Зайниддин Сафаров, вакили Маҷлиси намояндагони Маҷлиси Олии Ҷумҳурии Тоҷикистон дар ноҳияҳои Темурмалику Балҷувон бо интихобкунандагон вохӯрӣ доир намуд. Дар ин вохӯриҳо Зайниддин Сафаров ҷиҳати иштирок дар маъракаи интихоботии дар пешистода шаҳрвандонро даъват намуда, изҳор дошт, ки интихоби онҳо барои рушди кишвар нақши муҳимро мебозад ва шаҳрвандон бо интихоби номзади арзандаи дар рушди мамлакат, таҷдиду таҳкими қонунгузорӣ саҳми худро хоҳанд гузошт.
Зимни вохӯрӣ таъкид гардид, ки Барномаи Ҳизби аграрии Тоҷикистон ва барномаи З. Сафаров ба рушди ҳама соҳаҳои гуногуни кишоварзӣ, эҳёи деҳот ва беҳтар кардани шароити зиндагии мардум, пеш аз ҳама мардуми деҳот равона гардидааст. Бо ҳамин мақсад ҲАТ дар интихоботи навбатӣ теъдоди бештари номзадҳояшро ба мақомоти намояндагӣ аз ҷамоат то парламенти кишвар пешбарӣ намудааст.
Бояд тазаккур дод, ки Зайниддин Сафаров алҳол вакили Маҷлиси намояндагони Маҷлиси Олии Ҷумҳурии Тоҷикистон аз ҳисоби ҲАТ буда, номзадиаш дар интихоботи парлумонии қарибулвуқӯъ дар ҳавзаи якмандатии интихоботии Восеъ, 39 пешбарӣ гардидааст.
Дар ин бора аз маркази матбуоти Ҳизби аграрии Тоҷикистон хабар доданд.