Ярмаркаи маҳсулоти хӯрокӣ дар ВКД

Душанбе,27.02.2015. (АМИТ «Ховар», Муқаддас Темурзода).-Имрӯз бо ташаббуси роҳбарияти Вазорати корҳои дохилӣ ва бо мақсади ҳифзи иҷтимоии ҳайати шахсии мақомоти корҳои дохилӣ дар шафати бинои ВКД ҶТ ярмарка ва фурӯши маҳсулоти хоҷагии қишлоқ доир гардид.
Тибқи иттилои ВКД ҶТ, дар ярмарка маҳсулоти хӯрокворӣ аз хоҷагиҳои ёрирасони ВКД, хоҷагиҳои деҳқонии шаҳру ноҳияҳои вилояти Хатлон, ноҳияҳои тобеи марказ ва минтақаи Рашт оварда шуданд. 
Меваю сабзавоти тоза ва дигар маҳсулоти мавриди ниёзи мардум аз қабили пиёзу картошка, караму сабзӣ, гӯшту тухм ва себу нок бо нархи нисбат ба бозорҳои пойтахт арзонтар пешкаши харидорон шуданд.
Нархҳои маҳсулоти хӯрокворӣ чунин буд: як килограмм гӯшт 25 сомонӣ, биринҷ 6 сомонӣ, картошка, пиёз, сабзӣ 1,5 сомонӣ, себу нок 5-7 сомонӣ, 1 дона тухм 50 дирамро ташкил дод.
Бояд зикр намуд, ки чунин ярмаркаҳои маҳсулоти аввалия аз ҷониби роҳбарияти Вазорати корҳои дохилӣ барои ҳайати шахсии мақомоти корҳои дохилӣ мунтазам ташкил мешаванд.