Ёде аз оҳангсози маъруфи тоҷик

Душанбе, 03.02.2015 (АМИТ «Ховар», Мавҷуда Анварӣ).-  Бахшида ба ҳаёту эҷодиёти оҳангсози маъруфи тоҷик, дорандаи Ҷоизаи давлатии ба номи Абӯабдуллоҳи Рӯдакӣ шодравон Хайрулло Абдуллоев дар толори Иттифоқи композиторони Тоҷикистон ҳафтаи гузашта маҳфили мусиқӣ доир гардид. 
Тавре ки иброз гардид, оҳангҳои эҷодкардаи Хайрулло Абдуллоев дар такя ба мусиқии миллии тоҷик офарида шуда, аз ҷониби сарояндагони маъруф суруда шудаанд. То имрӯз оҳангҳои офаридаи ин шахсияти маҳбуб қадру манзалати баланд дошта, аз ҷониби сарояндагон пурра истифода мегарданд ва дар дили мардум ҷой гирифтаанд. 
Х. Абдуллоев инчунин оҳангҳоро бо истифода аз асбобҳои мусиқии касбии ҷаҳонӣ низ эҷод кардааст. Дар маҳфили мусиқӣ наздикону пайвандон ва он санъаткороне, ки бо шодравон Х. Абдуллоев ҳамкории зич доштанд, аз лаҳзаҳои ҳаёт ва шахсияти арзанда буданаш ёдовар шуданд. 
Сипас ҳунармандони шинохта ва санъаткорон аз эҷодиёти оҳангсоз барномаи ҷолиби консертиро ба ҳозирин пешниҳод карданд.