Занони Рашт ҷонибдори ваҳдату ягонагӣ

Душанбе, 25.02.2015. (АМИТ «Ховар», Лайло Тоирӣ). -Кумитаи кор бо занон ва оилаи назди Ҳукумати Ҷумҳурии Тоҷикистон ҷиҳати дар сатҳи баланд баргузор гардидани интихоботи дарпешистода аз 19 то 23 феврали соли 2015 дар байни занону духтарони ноҳияи Рашт оид ба паҳлуҳои гуногуни масоили занон, тарбияи дурусти фарзандон, тарбия дар руҳияи ватандӯстию ифтихори миллӣ, пешгирии ифротгароии ҷавонон, ҷонибдорӣ аз сиёсати пешгирифтаи Ҳукумати Ҷумҳурии Тоҷикистон, иштироки занон дар маъракаи сиёсӣ ва истифодаи неруи занон дар ин самт вохӯриҳо доир намуд.
Чунин вохӯриҳо дар деҳаи Новдонаки ҷамоати деҳоти Қалъаи Сурх бо иштироки 95 нафар, дар Коллеҷи тиббии ноҳияи Рашт дар байни донишҷӯён, дар ҷамоати деҳоти Қалъанак дар муассисаи таълимии №25 деҳаи Шаҳринав бо иштироки 100 нафар занону модарон,  21 феврал дар деҳаҳои Белчӣ, Боғистони ҷамоати деҳоти Боқӣ Раҳимзода бо 97 нафар зан, дар ҷамоати деҳоти Тагоба бо иштироки 87 нафар занону ҷавонон,  22 феврал дар деҳаи Янғолиқ ва Нимичи ҷамоати деҳоти Ҷафр байни 80 нафар занони хонанишин гузаронида шуданд.  23 феврал  дар байни 78 нафар занони корхонаи дӯзандагии «Зуҳал»-и ҷамоати деҳоти Ҳалқарф ва худи ҳамон рӯз бо 20 нафар занони деҳаи Бедак, фаъолон, сарварони мактабҳо, ҷавондухтарон ва занони хонанишин дар китобхона вохӯрӣ баргузор гардид.
Вохӯриҳо бо иштироки намояндагони мақомоти иҷроияи маҳаллии ҳокимияти давлатии ноҳия, раисони ҷамоатҳо, сарварони мактабҳо, занони фаъол ва хонанишин баргузор гардиданд. 
Руҳияи занону ҷавонони ноҳияи Рашт идона буда, онҳо аз сиёсати имрӯзаи Сарвари Давлат қаноатманд мебошанд.