“Қабодиён” номи “Заркамар”-ро гирифт

 Душанбе, 12.03.2015.(АМИТ “Ховар”, Марзия Саидзода).-Ахиран  дар иҷлосияи бисту якуми Маҷлиси миллӣ деҳоти “Қабодиён”-и ноҳияи Қубодиёни вилояти Хатлон ба “Заркамар” табдили ном кард.
Ин тадбир дар асоси пешниҳоди Ҳукумати Ҷумҳурии Тоҷикистон, илтимосномаи Маҷлиси вакилони халқи вилояти Хатлон ва Қарори Маҷлиси миллӣ  амалӣ гардонида шуд.
 “Заркамар” ном гирифтани деҳоти ноҳияи Қубодиён ба он рабт дорад, ки он дар соҳили дарёи Кофарниҳон доман густурда ва намуди ин мавзеъ зардранг аст, инчунин табдили ном кардани  деҳоти “Қабодиён” ба “Заркамар” бартараф кардани номи такрорист. 
Бояд тазаккур дод, ки дар зарфи панҷ сол Маҷлиси миллӣ 71 пешниҳоди Ҳукумати Ҷумҳурии  Тоҷикистонро марбут ба масъалаҳои сохти марзиву маъмурӣ баррасӣ ва ҷонибдорӣ намудааст, ки тибқи он номи 7 шаҳрак, 40 деҳот ва  601 деҳа тағйир дода шуд.