Ҷаласаи гурӯҳи махсуси кории давлатҳои узви СҲШ

 
Душанбе, 17.03.2015. (АМИТ «Ховар»). — 16 марти соли 2015 бо ибтикори Кумитаи давлатии сармоягузорӣ ва идораи амволи давлатии Ҷумҳурии Тоҷикистон ҷаласаи шашуми гурӯҳи махсуси кории давлатҳои узви Созмони Ҳамкории Шанхай оид ба мусоидат ба сармоягузориҳо ба кори худ оғоз намуд.
Сардори шуъбаи маҷмўӣ ва иттилооти Кумитаи давлатии сармоягузорӣ ва идораи амволи д влатии Ҷумҳурии Тоҷикистон Бахтиёр Назурдинов иттилоъ дод, ки дар ҷаласаи мазкур намояндагони масъули самти сармоягузорӣ, намояндагиҳои дипломатӣ ва тиҷоратии давлатҳои аъзои Созмон (Ҷумҳурии Қазоқистон, Ҷумҳурии Мардумии Чин, Ҷумҳурии Қирғизистон, Федератсияи Русия, Ҷумҳурии Ӯзбекистон, Ҷумҳурии Тоҷикистон), Котибот, Иттиҳодияи байнибонкӣ ва Шӯрои тиҷоратии Созмони Ҳамкории Шанхай иштирок намуданд.
Дар ҷаласа ширкаткунандагон ҷараёни иҷрои қисми 1 Нақшаи чорабиниҳо доир ба иҷрои «Барномаи ҳамкории тиҷоратӣ — иқтисодии давлатҳои аъзои СҲШ»-ро мавриди муҳокима қарор дода, оид ба лоиҳаи «Нақшаи чорабиниҳо доир ба рушди минбаъдаи фаъолияти лоиҳавӣ дар доираи СҲШ барои давраи солҳои 2017-2021» пешниҳодҳо манзур карданд.
Инчунин доир ба масъалаҳои таҳияи лоиҳаи «Созишнома оид ба ҳавасмандгардонӣ ва ҳифзи мутақобилаи сармоягузорӣ дар давлатҳои аъзои СҲШ», ҷараёни омодасозии маҷаллаи сармоягузории давлатҳои аъзои СҲШ, баргузории Форуми сармоягузории давлатҳои аъзои СҲШ, ки нахустини он моҳи сентябри соли 2014 дар шаҳри Душанбе баргузор гардид, ибрози ақида намуданд.
Зикр гардид, ки Ҷумҳурии Тоҷикистон дар соли раисии хеш дар СҲШ (2014) як силсила чорабиниҳои муҳими сиёсӣ ва иқтисодиро барпо намуд, ки дар пешбурди минбаъдаи фаъолияти СҲШ нақши арзанда бозидааст.
Дар интиҳои ҷаласа аз тарафи иштирокчиён Протоколи ҷаласаи шашуми гурӯҳи махсуси кории давлатҳои узви Созмони Ҳамкории Шанхай оид ба мусоидат ба сармоягузориҳо ба имзо расида, «Нақшаи кори гурӯҳи махсуси кории давлатҳои узви Созмони Ҳамкории Шанхай оид ба мусоидат ба сармоягузориҳо барои соли 2015» қабул мегардад.