Ҷашни байналмилалии Наврӯз дар Вена

Душанбе, 21.03.2015 (АМИТ «Ховар»).- 18 марти соли 2015 дар бинои Шуъбаи Созмони Милали Муттаҳид  дар Вена бо ибтикори Намояндагиҳои доимии кишварҳои ҳавзаи Наврӯз, аз ҷумла Тоҷикистон, Афғонистон, Эрон, Озарбойҷон, Қазоқистон, Қирғизистон, Туркия, Туркманистон ва Ӯзбекистон ҷашни байналмилалии Наврӯз таҷлил карда шуд.
Aз номи намояндагиҳои доимӣ Сафири Ҷумҳурии Исломии Афғонистон Аюб Ирфонӣ ҳозиринро хайрамақдам гуфт.  Сипас муовини мудири кулли Шуъбаи СММ дар Вена ҷаноби Дэннис Тчатчайчавалит паёми табрикии муовини Дабири кулли СММ, Мудири кулли Шуъбаи Созмони Милали Муттаҳид  дар Вена Юрий Федотовро ба меҳмонону иштирокчиёни чорабинӣ ироа намуд.
Намояндагии доимии Тоҷикистон дар қатори дигар кишварҳо гӯшаи фарҳангии худро бо наворҳои ҷолибу тамошобоби наврӯзӣ, намунаи ҳунарҳои халқӣ, аз ҷумла сӯзанӣ, гулдӯзӣ ва маводҳои гуногуни таблиғотӣ ороиш дод. Дар гӯшаи Тоҷикистон дастархонаи идона густурда шуда, ба меҳмонон намудҳои гуногуни ғизои миллӣ, меваҳои хушк ва тару тоза пешниҳод гардиданд. Аз гушаи Тоҷикистон теъдоди зиёди ширкаткунандагон дидан карданд.