Ҷавонон бояд ҳушёр бошанд

Душанбе, 16.03.2015. (АМИТ «Ховар», Раъно Нусратуллозода).- 14 март бо ташаббуси шуъбаи тарбияи Донишкадаи молия ва иқтисоди Тоҷикистон вохӯрии кормандони Кумитаи давлатии амнияти миллӣ Қаноатулло Сайфуллоев ва Икром Сатторов бо донишҷӯён ва устодон доир гардид. 
Ба иттилои котиби матбуоти донишкада Машҳура Абдуллоева ноиби ректор оид ба таълим Илҳомуддин Иброҳимов изҳор дошт, ки вохӯрӣ барои баланд бардоштани маърифати ҳуқуқӣ ва сиёсии донишҷӯёну кормандон мусоидат менамояд.
Полковники Кумитаи давлатии амнияти миллӣ Қаноатулло Сайфуллоев изҳор дошт, ки аз соли 2010 то инҷониб 3 ҳазору 178 нафар толибилме, ки дар хориҷи кишвар таҳсили динии ғайриқонунӣ дошт, баргардонида шуд. Аз ин 5 фоизашро занону духтарон ташкил медиҳад. Инчунин дар вохӯрӣ доир ба гаравиши ҷавонон ба ҳизбу ҳаракатҳои ғайриқонунӣ сухан рафта, хатари онро ба ҷомеаи Тоҷикистон иброз намуданд. Бехатарии сарҳадӣ, ҷангҳои дохилӣ дар кишвари ҳамсояи Афғонистон, ба доми фиребу ифротгароён наафтодани ҷавонону наврасон низ мавриди муқокима қарор гирифт. Таассуфовар аст, ки дар ҷангҳои Сурия ва Ироқ шаҳрвандони раҳгумзадаи Тоҷикистон низ иштирок намуда, ҷони худро қурбони дасисаҳо ва фиреби гурӯҳҳои террористӣ гардониданд. 
Дар вохӯрӣ ҷавононро ба ҳушёрии сиёсӣ, худшиносии миллӣ ва ифтихори ватандорӣ даъват намуданд.