150 000-и «Хомаи созанда» ба беҳтарин маводи журналистӣ

Душанбе, 12.03.2015. (АМИТ «Ховар», Мавҷуда Анварӣ).-Имсол бо ташаббуси раиси вилояти Суғд Абдураҳмон Қодирӣ бо мақсади сари вақт хабардор кардани ҷомеа аз раванди рушду такомули соҳаҳои мухталифи хоҷагии халқ, тавзеҳи воқеъбинона,  асоснокии дигаргунсозӣ ва мушкилоти дорои аҳамияти махсуси иҷтимоӣ, ҳамзамон ҷалби таваҷҷуҳи аҳли ҷомеа ба масъалаҳои ҳалталаб озмуни беҳтарин маводи журналистӣ дар соли 2015 таҳти унвони “Хомаи созанда” доир мегардад.
Дар ин бора муовини якуми раиси вилоят Ҷумъабой Сангинов зимни вохӯрӣ  бо журналистон, ки дирӯз, 11 март дар Кохи матбуоти шаҳри Хуҷанд бахшида ба Рӯзи матбуоти тоҷик баргузор гардид, иттилоъ дод.
Ҷумъабой Сангинов гуфт, дар озмуни “Хомаи созанда” журналистон метавонанд дар бораи тадбирҳо оид ба ҳифзи саломатии модару кӯдак, пешгирии худкушӣ ва дигар зуҳуроти номатлуб, тарғиби «Соли оила», фарҳанги оиладорӣ ва устувории он, тарбияи насли наврас, пешгирии никоҳи хешутаборӣ ва муноқишаҳои оилавӣ, эҳёи анъанаҳои миллӣ ва ғайра маводи таҳлилии худро, ки дар марҳилаи аз 1 январи соли 2015 то 1 октябри соли 2015 пахш ва ё нашр гардидаанд, пешниҳоди ҳайати ҳакамон намоянд.
Тибқи иттилои Хадамоти матбуоти раиси вилояти Суғд, барои озмуни имсолаи беҳтарин маводи журналистӣ дар соли 2015, ки таҳти унвони “Хомаи созанда” доир мегардад, 150 000 сомонӣ маблағ пешбинӣ шудааст.