Аҳамияти беназири об чун сарчашмаи ҳаёт

Душанбе,16.03.2015. (АМИТ «Ховар», Раъно Нусратуллозода).-14 март дар Донишкадаи молия ва иқтисоди Тоҷикистон дар доираи 10-солагии «Амалиёти об барои ҳаёт» дар мавзӯи «Об — сарчашмаи ҳаёт» мизи мудаввар доир гардид. 
Бино ба иттилои котиби матбуоти донишкада Машҳура Абдуллоева ноиби ректор оид ба илм Ғиёсиддин Ашуров афзуд, ки маҳз бо талошу иқдомҳои созандаи Президенти кишвар Эмомалӣ Раҳмон Тоҷикистон ҳамчун кишвари ташаббускор дар самти ҳамкорӣ дар соҳаи об дар ҷаҳон маълум гаштааст. 
Сардори Раёсати захираҳои оби Вазорати энергетика ва захираҳои оби Ҷумҳурии Тоҷикистон Тағоймурод Гулов дар мавзӯи «Захираҳои обӣ ва аҳамияти онҳо барои рушди устувори Тоҷикистон» маърӯза намуда, зикр намуд, ки бо ташаббуси Тоҷикистон аз минбарҳои баланди СММ соли 2003 — Соли байналмилалии оби тоза, солҳои 2005-2015 Даҳсолаи об барои ҳаёт ва соли 2013 -Соли ҳамкорӣ дар соҳаи об эълон гардид. Дар ин муддат шаҳри Душанбе борҳо ба маркази баргузории чорабинӣ ва конфронсҳои бузурги сатҳи байналмилалӣ мубаддал гардид. 
Асоси сарчашмаи обии Тоҷикистонро пиряхҳо ташкил медиҳанд, ки 845 километр тӯл кашидаанд. Дар қаламрави Тоҷикистон 947 дарё бо дарозии умумии 28 ҳазору 500 км ҷорӣ мегардад. Аз рӯи захираҳои гидроэнергетикӣ Тоҷикистон дар Осиёи Марказӣ дар ҷои якум ва дар ҷаҳон ҷои 8-умро соҳиб аст,- иброз дошт Т.Гулов. 
Дар ҷамъомад инчунин дар мавзӯи «Муоина ва ҳифзи захираҳои манбаъҳои обӣ дар ҶТ», «Ташхис ва сифати захираҳои об ва масъалаи пешгирии ифлосшавии онҳо», «Мавқеи об дар эҷодиёти олимони Машриқзамин» маърӯзаҳо шунида шуда, аз аҳамияти беназири об ҳамчун сарчашмаи ҳаёт ёдовар шуданд.