Афзоиши истеҳсоли орд дар Кӯлоб

 Кӯлоб, 16.03.2015. (АМИТ «Ховар», Сулаймони Хол).-Корхонаи истеҳсоли орди  шаҳри Кӯлоб, ки  аз ҷониби фармоишгар Агентии  захираҳои  моддии  давлатии  назди Ҳукумати ҶТ  соли 2013  баъди бо таҷҳизоти  муосири  корӣ таъмин  гардидан  дубора ба фаъолият оғоз кард, дар паст кардани нархи маҳсулот,  аз ҷумла орд саҳми муносиб дорад. Ба гуфти директори  корхонаи мазкур  Ҷамшед  Амиров   маҳсулоти  тавлид намудаи   корхона  навъи якум  ва дуюм буда,  он бо истифода   аз таҷҳизоти  пешрафтатарини  давлати Туркия  коркард мешавад.  Корхона  дар соли 2014  нисбат ба соли 2013  бештар маҳсулот омода намудааст, ки дар шаҳру  ноҳияҳои минтақаи Кӯлоб  ва Вилояти Мухтори Кӯҳистони  Бадахшон  ба фурӯш гузошта мешаванд.   Тамоми ашёи хом  барои коркард  аз ҳисоби   Агентии  захираҳои моддии  давлатии назди  ҳукумати ҶТ  дастрас  мегардад  ва дар он 60 нафар сокини маҳаллӣ  ба кори доимӣ ҷалб гардидааст.  Бо мусоидати  мақомоти иҷроияи  ҳокимияти давлатии  шаҳри Кӯлоб  корхона   бо хати озоди барқ таъмин буда, дар ду баст  фаъолият  дорад.