Ба вакили арзанда овоз медиҳем!

Душанбе, 1.03. 2015. (АМИТ «Ховар», Раъно Нусратуллозода).-Имрӯз, 1 март мардуми Тоҷикистон  дар интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ ба ҳавзаҳои интихоботӣ рафта, барои номзадҳои арзандаи хеш овоз дода истодаанд. 
Дар  участкаи интихоботии №10, ҳавзаи интихоботии №3, воқеъ дар муассисаи таҳсилоти ҳамагонии умумии №15 ноҳияи Шоҳмансури шаҳри Душанбе ба иттилои раиси комиссияи ҳавзавӣ Муслиҳиддин Аминов то ин соат зиёда аз 425 нафар  овоз додааст.  М.Аминов иброз дошт, ки аз  1 ҳазору  146 интихобкунанда 20 нафари онҳо бори аввал иштирок карда, овози худро медиҳанд.
Дар ин маъракаи муҳими сиёсӣ дар ин ҳавза дар баробари нозирони маҳаллӣ, инчунин нозирони байналмилалӣ ҷараёни интихоботро назорат доранд.