Бархурдории 2000 сокини Хуҷанд аз хони наврӯзӣ

Хуҷанд, 17.03.2015. (АМИТ “Ховар”,Абдуаҳад Шарифзода).-Дар арафаи Иди Наврӯз наздик ба 2000 нафар сокини Хуҷандшаҳр аз кумаки идонаи мақомоти шаҳри Хуҷанд бархурдор хоҳад гашт. 
Тавре ки ба АМИТ “Ховар” аз мақомоти шаҳри Хуҷанд иттилоъ доданд, тибқи дастуру супориши раиси шаҳри Хуҷанд Раҷаббой Аҳмадзода чун анъана соли равон низ дар рӯзҳои ҷашнгирии Наврӯзи хуҷастапай шахсони камбизоату танҳо ва шахсони имконияташон  маҳдуд аёдат шуда, ба онҳо кумаки моддӣ иборат аз маводи хӯрокӣ расонда мешавад. 
Инчунин дар рӯзҳои наврӯзӣ  аз ҷониби раиси шаҳр низ чанд нафар оилаҳои собиқадорони меҳнат ва ҳамчунин ниёзманд аёдат шуда, ба онҳо хони наврӯзӣ тақдим мешавад.
Ҳамзамон расонидани кумаки идона аз ҷониби ташкилотҳову соҳибкорон низ дар назар аст. 
  Бояд гуфт, ки дар идомаи ин иқдом, тиқби супориши шаҳрдори Хуҷанд чун солҳои қаблӣ соли равон низ  барои 22 маҳаллаи шаҳр баҳри таҷлили иди Наврӯз ва тайёр намудани таоми наврӯзии суманак аз ҷониби мақомоти шаҳр орд ва равған ройгон дастрас  мешавад.