Бунёди сохтмони корхонаи аккумулятор дар Суғд

Душанбе, 31.03.2015. (АМИТ «Ховар», Мавҷуда Анварӣ). -Дирӯз раиси вилояти Суғд Абдураҳмон Қодирӣ директори навтаъйини Ширкати саноати кӯҳии Тоҷикистону Чин Эн Ҷи Сай ва ҳайати ҳамроҳонашро ба ҳузур пазируфт.
Зимни суҳбат сохтмони комбинати металлургӣ дар шаҳри Истиқлол мавриди баррасӣ қарор гирифт. Комбинати металлургии Ширкати саноати кӯҳии Тоҷикистону Чин дорои иқтидори коркарди 50 ҳазор тонна сурб ва 50 ҳазор тонна руҳ дар як сол мебошад ва тавре ки таъкид гардид, корхона аввалҳои соли 2017 ба кор дароварда мешавад.
Алҳол корхонаи коркарди маъданҳои кӯҳии Ширкати саноати кӯҳии Тоҷикистону Чин дар шаҳраки Зарнисор фаъолият дорад, ки он бо коркарди аввалияи маъдани руҳ ва сурб машғул аст. Ҳоло дар ин корхона беш аз 1100 нафар бо кори доимӣ ва маоши хуб таъмин гардидааст.
Абдураҳмон Қодирӣ ба роҳбари навтаъйини коргоҳ барои амалӣ гаштани нақшаҳо барору комёбӣ хост ва омодагии мақомоти иҷроияи ҳокимияти давлатии вилоятро ҷиҳати рушди ҳамкориҳои судманд изҳор дошт.
Эн Ҷи Сай иттило дод, ки соли ҷорӣ дар ҳудуди корхонаи муштараки Тоҷикистону Чин сохтмони корхонаи истеҳсолкунандаи қисмҳои эҳтиётӣ барои таҷҳизоти корхона ва мошинҳо ва сохтмони корхонаи аккумулятор оғоз мегардад, ки барои ин лоиҳаҳо маблағҳои сармоягузорони давлати Чин равона мешаванд.