Даъвати ПСС ҶТ дар бораи ҳамкорӣ

Душанбе, 16.03.2015. (АМИТ «Ховар», Кристина  Эрлих).-  13  март муовини раиси  Палатаи  савдо  ва  саноати  ҶТ  Манзура  Рустамова  дар  шаҳри  Душанбе бо  сафири  Ветнам  дар  Тоҷикистон Фам  Ван Фао мулоқот  анҷом  дод. 
Тавре  ки  аз Палатаи  савдо  ва  саноати  ҶТ хабар доданд, ҷонибҳо  дурнамои ҳамкории тиҷоратию  иқтисодиро мавриди  муҳокима  қарор  доданд. Дар  ҷараёни  мулоқот  ба роҳандозии  муколамаи  судманди  соҳибкорон  бо  василаи  ташкили  марказҳои  муштарак, доир  намудани  конфронсҳо ва намоишгоҳу  ярмаркаҳо таваҷҷӯҳи  хоса  зоҳир  гардид. 
Манзура  Рустамова  иброз  дошт, ки  муроҷиатномаи раиси  ПСС ҶТ  Ш.Саид  дар  бораи  ҳамкорӣ  ба Палатаи  савдо  ва  саноати Ветнам ирсол  мегардад. 
Фам Ван Фао  дар навбати  худ  зикр намуд, ки барқарор  намудани  равобити  устувори  соҳибкорону тоҷирони  ҳар  ду  кишвар барои  рушду  таҳкими  муносибатҳои  боварибахш аҳамияти  бориз  дорад. Пешниҳод  шуд, ки  аҳли  тиҷорат ба густариши  равобити дуҷонибаи  тиҷоратию  иқтисодӣ  фаъолона ҷалб  карда шаванд. Сафир  ҳамчунин  зикр намуд, ки  Ветнам ҷонибдори  рушду  таҳким  бахшидани  ҳамкорӣ бо  Тоҷикистон  дар соҳаи  кишоварзӣ, аз ҷумла  дар  бахши  кирмакпарварӣ ва моҳидорӣ мебошад.