Гумонбарии 3 шаҳрванд дар ҷинояти роҳзанӣ

Душанбе, 28. 03. 2015. (АМИТ «Ховар», Муқаддас Темурзода).-25 март тахминан соати 02:00-дақиқаи шаб, шахсони номаълум вориди хонаи истиқоматии зани 48-сола, сокини ноҳияи Ҷалолиддини Румӣ гардида, ӯ ва духтари 17-солаашро лату кӯб намуда, аз дохили сандуқи оҳанинаш маблағи пулии 4 100 сомонӣ, 15 ҳазор рубли Федератсияи Русия, 200 доллари ИМА ва ҷавоҳироти тиллоӣ, ҷамъ ба маблағи 15 ҳазор сомониро  тасарруф намуда, аз ҷойи ҳодиса ғайб задаанд.
Назар ба иттилои ВКД ҶТ, аз ҷониби кормандони милитсия дирӯз се нафар сокини ҳамин ноҳия ҷавонони 27-сола, 24-сола ва 22-солае, ки охирин қаблан бо моддаи 199 , қ 1 КҶ ҶТ суд шудааст, ҳамчун гумонбар дастгир намуданд.  
Нисбат ба далели мазкур парвандаи ҷиноятӣ оғоз гардида, тафтиш идома дорад.