Густариши муносибот миёни Тоҷикистону Салтанати Уммон

 
Душанбе, 11.03.2015. (АМИТ «Ховар», Мавҷуда Анварӣ). — «Бароям мояи ифтихор аст, ки имрӯз ҳамчун Сафири Фавқулода ва Мухтори Салтанати Уммон эътимодномаи худро ба Президенти Тоҷикистон супоридам. Пеш аз ҳама мехостам зикр намоям, ки муносибатҳои дуҷониба миёни Тоҷикистон ва Салтанати Уммон рӯ ба рушд доранд»,-гуфт ба хабарнигорон 10-уми марти соли ҷорӣ пас аз анҷоми супоридани эътимоднома сафири нави Салтанати Уммон дар Тоҷикистон  Саид ибн Аҳмад ибн Холид Ал-Барованӣ. 
Ӯ зикр дошт, ки ба ҳайси сафири Салтанати Уммон кӯшиш менамояд, ки иқтидорҳои мавҷудаи ҳамкориҳоро самаранок ба манфиати ҳарду давлат истифода ва татбиқ намояд.
Сафири навтаъйин иброз намуд, ки муносиботи Салтанати Уммон бо Тоҷикистон тамоюли рушд дошта, минбаъд низ дар бахшҳои гуногун густариш хоҳанд ёфт.
«Мо барои густариш ва равнақи минбаъдаи муносибатҳои ҳасана ва ҳамкориҳои созанда байни ду кишвар умедвор ҳастем. Ба назари ман барои тақвият ва таъмини рушди ҳамкориҳо миёни Тоҷикистон ва Салтанати Уммон имкониятҳои бузург ва иқтидори фарох мавҷуд аст.  Дар оянда умед дорем, ки созишнома ва тавоқуфномаҳои байни ҳарду кишвар ба имзо хоҳанд расид»,-илова намуд сафири навтаъйин. 
Дар ниҳоят барои рушди минбаъдаи муносибатҳои Салтанати Уммону Точикистон муваффақият орзу намуд.