Иқдоми хайр дар арафи Наврӯз

 
        Душанбе, 12.03.2015.(АМИТ “Ховар”, Марзия Саидзода).-Дар арафаи ҷашни Наврӯз бо дастури раёсати дафтари намояндагии Кумитаи имдоди имом Хумайнӣ дар Тоҷикистон ба гурӯҳе аз занони бесарпарасти минтақаи Қӯрғонтеппа кумаки ғизоӣ ва маводи шустушӯӣ расонида шуд.
  “Ин кумакҳо тавассути шуъбаи Кумитаи имдод дар шаҳри  Қӯрғонтеппа ба занони ниёзманд  сари вақт дастрас гардиданд”, гуфт дар суҳбат ба хабарнигори АМИТ “Ховар” Абдуғаффори Солеҳ –корманди ин кумита дар шаҳри Қӯрғонтеппа. Мавсуф афзуд, ки ҳамзамон ин иқдомро чанде аз хайирини маҳаллӣ ҷонибдорӣ намуда,  аз тарафи онҳо ба миқдори 10 килоӣ орд ба ин кумакҳо илова шуд.
  Абдуғаффори Солеҳ афзуд, ки Кумитаи имдод аз тариқи дармонӣ, фарҳангӣ, ғизоӣ ва худкифоӣ ба ниёзмандон кумак мерасонад. Барномаи худкифоии ин ниҳоди хайрия барои  рушди зиндагӣ ва ба кор ва шуғли муайян фаро гирифтани духтарону занони ниёзманд иқдомоти наҷиберо ба роҳ мондааст, ки ба онҳо ба муддати 2 сол қарзи бе фоиз дода мешавад, ки аз рӯи шароити доштаашон имкон доранд корҳоеро  ривоҷ дода, вазъи зиндагии худро беҳтар созанд. Дар айни замон зиёда аз 100 нафар модарони сарпарасти оила дар минтақаи Қӯрғонтеппа  аз тарҳи худкифоии Кумитаи имдод бархурдор буда, ба тиҷорат, парвариши чорво, гулпарварӣ, асалпарварӣ, дӯзандагӣ ва соири ҳунарҳои мардумӣ машғуланд.
Ҳамзамон Кумитаи имдод дар ҳамкорӣ бо Вазорати меҳнат ва шуғли аҳолии Тоҷикистон, инчунин барои фарзандони оилаҳои ниёзманду  бесарпараст марказҳои омӯзишии дӯзандагӣ, компютер, кафшергарӣ,  лӯлакашӣ ва ғайраро дар тамоми манотиқи кишвар таъсис додааст, ки  аз он ба таври ройгон омӯзиш мегиранд.