Исфара ба истиқболи Наврӯз ороиш меёбад

Душанбе,19.03.2015 (АМИТ “Ховар”, Рафоати Абдулҳамид).- Пиру барнои Исфарамарз ин рӯзҳо ба ҷашни ҷаҳонии Наврӯз ҳамаҷониба омодагӣ доранд.
Тавре ки Хадамоти матбуоти раиси вилояти Суғд хабар додааст,  тибқи нақшаи чорабиниҳои тарҳрезигашта ҷиҳати тозаву озода намудани ҳудуди шаҳр, ороиши идонаи ҷашнгоҳҳо, биноҳо ва кӯчаву хиёбонҳо бо шиору овезаҳо, шинонидани дарахту буттаҳои ҳамешасабз, гулҳои рангоранг ва корҳои ободонӣ амалҳои зиёд анҷом дода мешаванд.
Дар ин бора Иқбол Тешаев, сухангӯи шаҳрдори Исфара иттилоъ дода, афзуд, ки шаҳр аллакай намуди хушу идона гирифтааст ва табъи мардумонаш низ идонаву болида аст.