Кӯлоб: омодагиҳо ба истиқболи Наврӯз

Кӯлоб, 17.03.2015.(АМИТ «Ховар», Фарҳоди Мадамин).- Маҷлиси назоратии назди раиси шаҳри Кӯлоб масъалаи омодагӣ ба истиқболи иди Наврӯз ва қабули меҳмонон аз ИДМ-ро мавриди  баррасӣ қарор дод. Тавре ки маълум аст, имсол дар шаҳри Кӯлоб се ҷашнвораи бузург истиқбол гирифта мешавад, ки дар чаҳорчӯби  «Пойтахти фарҳангии ИДМ эълон шудани шаҳри Кӯлоб дар соли 2015» дар рӯзҳои истиқболи иди Наврӯз як ҳайати баландпояи меҳмонон аз давлатҳои ИДМ ба шаҳри Кӯлоб ташриф меоранд.  Дар назар аст, ки 25 март дар рӯзҳои таҷлили Наврӯз маросими супоридани шаҳодатномаи Пойтахти фарҳангӣ ба шаҳри Кӯлоб ва гузоштани санги асос дар макони бунёди Рамзи Пойтахти фарҳангӣ баргузор гардад. Ба хотири дар сатҳи баланд баргузор намудани иди Наврӯз ва пешвози меҳмонони олиқадр дар шаҳр гурӯҳҳои корӣ таъсис ёфтаанд, ки шаҳрро то рӯзи ид аз лиҳози тозагиву озодагӣ омода хоҳанд кард. Ҳамчунин ба ин хотир дар тамоми кӯчаву маҳаллаҳо, идораву ташкилотҳо, корхонаву муассисаҳо мунтазам шанбегиҳо гузаронида мешаванд.