М. Фарҳодӣ хостори тақвияти ҳамкориҳои илмӣ шуд

Душанбе, 18.03.2015.(АМИТ «Ховар», Марзия Саидзода).- Густариши ҳамкориҳои илмӣ ва фановарӣ зимни мулоқоти  Неъматулло Эмомзода — Сафири Фавқулода ва Мухтори  Ҷумҳурии Тоҷикистон дар Ҷумҳурии исломии Эрон бо доктор Муҳаммади Фарҳодӣ — вазири улуми Эрон дар Теҳрон матраҳ гардид.
Дипломати тоҷик хостори густариши беш аз пеши робитаҳо ва ҳамкориҳои илмию фановарӣ байни ду кишвар шуда, гуфт, ки алҳол 450 донишҷӯи тоҷик дар донишгоҳҳои Эрон таҳсил мекунанд ва пешниҳод мекунам донишҷӯёни мо дар риштаҳое қабул шаванд, ки дар оянда тавонанд дар рушди соҳаҳои мухталифи кишвар саҳми муассир гузоранд. 
Сафир афзуд, ки Тоҷикистон кишвари ҷавон буда, ниёзи бештар ба мутахассисони бахши улуми фановарӣ дорад. 
            Вазири улуми Эрон Муҳаммади Фарҳодӣ таъкид намуд, ки Тоҷикистон ва Эрон дар заминаҳои мухталиф муштаракоти фаровоне доранд ва ҳарчи зудтар миёни ду кишвар дуюмин кумитаи илмии муштарак бо ҳузури намояндагони ду кишвар дар ростои амалӣ кардани моддаҳои тафоҳумномаҳои имзошуда анҷом шавад.
Вазир пешниҳод намуд таҳсили донишҷӯёни тоҷик дар давраҳои коршиносии аршад ва докторӣ тақвият ёбад ва фурсатҳои мутолиотию таҳқиқотӣ барои устодони донишгоҳҳои Тоҷикистон дар донишггоҳҳои Эрон фароҳам шавад. Ҳамзамон таъкид гардид, ки солона 250 нафар аз донишҷӯёни тоҷик метавонанд ба сурати бурсия дар донишгоҳҳои Эрон таҳсил намоянд.