Меъёри андоз ба ширкатҳои мобилӣ тағйир дода мешавад

 Душанбе,  12.03.2015.(АМИТ «Ховар», Марзия Саидзода).-Палатаи болоии Парлумони мамлакат-Маҷлиси миллӣ   Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси андози Ҷумҳурии Тоҷикистонро ҷонибдорӣ намуд, ки тибқи он меъёри андоз ба ширкатҳои алоқаи мобилии кишвар тағйир дода мешавад. Ҳадафи ин тадбир баланд будани даромаднокии  ширкатҳои алоқаи мобилӣ арзёбӣ мегардад.  
          Ҳамзамон тибқи тағйиру иловаҳо  ба Кодекси андози Тоҷикистон бинобар сабабе, ки воситаҳои  нақлиёти ҳарбии махсус  ва техникаҳои махсуси ҳарбӣ аз буҷет маблағгузорӣ мегарданд, онҳо  аз пардохти андози воситаҳои нақлиёт озод мешаванд. 
         Инчунин дар асоси тағйиру иловаҳо ба Кодекси андоз аз ҳисоби андозҳои молумулкии  ба соҳибкорӣ  машғулбуда, зиёд кардани  воридоти умумии андозҳои маҳаллии шаҳрҳои Душанбе, Хуҷанд, Кӯлоб, Қӯрғонтеппа пешбинӣ гардидааст. Мақсади пешниҳоди ин тағийрот дар он аст, ки сатҳи даромад аз истифодаи объектҳои ғайриманқулӣ дар ин шаҳрҳо дар қиёс ба дигар минтақаҳои кишвар  бамаротиб зиёд мебошад.
     Бояд тазаккур дод, ки  тибқи тағйирот  муқаррароти амалкунандаи қонун  содда гардонида шуда, Кодекси андози кишвар  барои ғанӣ гардонидани қисми даромади  буҷет шароит  фароҳам меорад.