Муаррифии «Менеҷмент» ва «Менеҷменти стратегӣ»

Душанбе, 12.03.2015. (АМИТ «Ховар», Раъно Нусратуллозода).-10 март дар Вазорати рушди иқтисод ва савдои Ҷумҳурии Тоҷикистон  бо ташаббуси Донишкадаи молия ва иктисоди Тоҷикистон (ДМИТ) муаррифии китобҳои «Менеҷмент» ва «Менеҷменти стратегӣ» доир гардид. Дар муаррифии китобҳо намояндагони Вазорати молияи ҶТ, ректорон ва мудирони кафедраҳои менеҷменти донишгоҳҳои Тоҷикистон, олимон ва иқтисодчиёни варзидаи кишвар, намояндагони вазорату сохторҳои дахлдор иштирок намуданд.
Ба иттилои котиби матбуоти донишкада Машҳура Абдуллоева ректори ДМИТ Ашурбой Солиев изҳор намуд, ки таҳияи китобҳои  дарсӣ бо забони давлатӣ талаботи замони муосир мебошад. Раёсати донишкада дар ин самт муаллифони китобро бо роҳбарии Шавкат Бозоров дастгирӣ намуда, минбаъд низ дар таҳияи дастур ва китобҳои дарсӣ тадбирҳо андешиданашро изҳор намуд.
Китоби «Менеҷмент» аҳамияти ин соҳаро  дар ҷомеаи муосир бозгӯ мекунад. Тавре ки Шавкат Бозоров зикр намуд, менеҷменти стратегӣ бо тарзҳо ва ғояҳои нав мунтазам тақвият меёбад. Аз ин лиҳоз, зарур аст, ки донишҷӯён, роҳбарон ва менеҷерҳо на танҳо бо дастовардҳои назарияи маъмулӣ ва тарзҳои менеҷменти  стратегӣ шинос бошанд, балки бо назардошти дурнамои Тоҷикистон самтҳои густариши онро муаррифӣ созанд. Китоб аз он ҷиҳат пурарзиш аст, ки  дар баробари мавзӯъҳои муҳими менеҷменти стратегӣ, махсусиятҳои ҷудогонаи иқтисодиёти Тоҷикистонро низ дар бар гирифтааст.